ਪ੍ਰਭਾਵਸ਼ਾਲੀ ਲੋਕਾਂ ਦੇ ਨਾਮਾਂ ਦਾ ਖੁਲਾਸਾ ਕਰਨ ਟਰਾਂਸਪੋਰਟ ਮੰਤਰੀ: ਖੰਗੂੜਾ - 14/12/2010
ਚੰਡੀਗੜ੍ਹ, 14 ਦਸੰਬਰ: ਕਿੱਲ੍ਹਾ ਰਾਏਪੁਰ ਤੋਂ ਕਾਂਗਰਸੀ ਵਿਧਾਇਕ ਜੱਸੀ ਖੰਗੂੜਾ ਨੇ ਮੰਗਲਵਾਰ ਨੂੰ ਪੰਜਾਬ ਦੇ ਟਰਾਂਸਪੋਰਟ ਮੰਤਰੀ ਮਾਸਟਰ ਮੋਹਨ ਲਾਲ ਤੋਂ ਉਨ੍ਹਾਂ ਤਾਕਤਵਰ ਅਤੇ ਪ੍ਰਭਾਵਸ਼ਾਲੀ ਵਿਅਕਤੀਆਂ ਦਾ ਨਾਮ ਪੁੱਛਿਆ ਹੈ, ਜਿਨ੍ਹਾਂ ਨੇ ਸੂਬੇ ਦੀ ਟਰਾਂਸਪੋਰਟ ’ਤੇ ਆਪਣਾ ਕਬਜ਼ਾ ਜਮਾ ਰੱਖਿਆ ਹੈ ਅਤੇ ਪ੍ਰਦੇਸ਼ ਦੇ ਮੁੱਖ ਕਮਾਈ ਵਾਲੇ ਰੂਟਾਂ ’ਤੇ ਆਪਣੀਆਂ ਬੱਸਾਂ ਚਲਾ ਰਹੇ ਹਨ।
ਟਰਾਂਸਪੋਰਟ ਮੰਤਰੀ ਦੇ ਉਸ ਬਿਆਨ ਕਿ ਪੰਜਾਬ ਦੇ ਟਰਾਂਸਪੋਰਟ ਬਿਜਨੇਸ ’ਤੇ ਕੁਝ ਤਾਕਤਵਰ ਵਿਅਕਤੀਆਂ ਨੇ ਆਪਣਾ ਕਬਜ਼ਾ ਜਮਾ ਰੱਖਿਆ ਹੈ, ਦਾ ਖੰਗੂੜਾ ਨੇ ਸਵਾਗਤ ਕੀਤਾ ਹੈ। ਨਾਲ ਹੀ ਉਨ੍ਹਾਂ ਨੇ ਟਰਾਂਸਪੋਰਟ ਮੰਤਰੀ ਨੂੰ ਅਪੀਲ ਕੀਤੀ ਹੈ ਕਿ ਉਹ ਹੋਰ ਅੱਗੇ ਵੱਧਦਿਆਂ ਉਨ੍ਹਾਂ ਲੋਕਾਂ ਦੇ ਨਾਮਾਂ ਦਾ ਖੁਲਾਸਾ ਕਰਨ, ਜਿਨ੍ਹਾਂ ਨੇ ਪੰਜਾਬ ਦੇ ਟਰਾਂਸਪੋਰਟ ਬਿਜ਼ਨੇਸ ਨੂੰ ਆਪਣੇ ਰੁਤਬੇ ਦੀ ਵਰਤੋਂ ਕਰਦਿਆਂ ਹੱਥਾਂ ’ਚ ਲੈ ਰੱਖਿਆ ਹੈ।
ਖੰਗੂੜਾ ਨੇ ਕਿਹਾ ਕਿ ਉਹ ਇਸ ਗੱਲ ਨੂੰ ਮੰਨਦੇ ਹਨ ਕਿ ਪੰਜਾਬ ਦੇ ਟਰਾਂਸਪੋਰਟ ਬਿਜ਼ਨੇਸ ’ਤੇ ਕੁਝ ਪ੍ਰਭਾਵਸ਼ਾਲੀ ਵਿਅਕਤੀ ਆਪਣੇ ਰੁਤਬੇ ਅਤੇ ਉੱਚੀ ਪਹੁੰਚ ਦਾ ਇਸਤੇਮਾਲ ਕਰਦਿਆਂ ਕਬਜ਼ਾ ਜਮਾਏ ਬੈਠੇ ਹਨ, ਜਿਸਦਾ ਖਾਮਿਆਜਾ ਪੰਜਾਬ ਰੋਡ ਟਰਾਂਸਪੋਰਟ ਕਾਰਪੋਰੇਸ਼ਨ ਨੂੰ ਭਾਰੀ ਵਿੱਤੀ ਘਾਟੇ ਦੇ ਰੂਪ ’ਚ ਚੁੱਕਣਾ ਪੈ ਰਿਹਾ ਹੈ।
ਉਨ੍ਹਾਂ ਨੇ ਸਾਫ ਕੀਤਾ ਕਿ ਮੇਰੀ ਤਰ੍ਹਾਂ ਪੰਜਾਬ ’ਚ ਸਾਰੇ ਜਾਣਦੇ ਹਨ ਕਿ ਕਿਸਨੇ ਸੂਬੇ ਦੇ ਟਰਾਂਸਪੋਰਟ ਬਿਜ਼ਨੇਸ ਨੂੰ ਆਪਣੇ ਹੱਥ ’ਚ ਲੈ ਰੱਖਿਆ ਹੈ ਅਤੇ ਆਪਣੀ ਮੋਨੋਪਾਲੀ ਜਮਾ ਲਈ ਹੈ। ਖੰਗੂੜਾ ਨੇ ਕਿਹਾ ਕਿ ਇਹ ਚੰਗਾ ਹੋਵੇਗਾ ਕਿ ਟਰਾਂਸਪੋਰਟ ਮੰਤਰੀ ਸਾਰੀ ਸੱਚਾਈ ਦਾ ਖੁਦ ਖੁਲਾਸਾ ਕਰਨ।
ਟਰਾਂਸਪੋਰਟ ਸੈਕਟਰ ਨੂੰ ਅਤੇ ਇਸ ਦੇ ਰੂਪ ਪਰਮਿਟ ਸਿਸਟਮ ਨੂੰ ਇੱਕ ਵਾਰ ਫਿਰ ਤੋਂ ਉਦਾਰਵਾਦੀ ਬਣਾਉਣ ਦੀ ਮੰਗ ਨੂੰ ਦੁਹਰਾਉਂਦਿਆਂ ਖੰਗੂੜਾ ਨੇ ਕਿਹਾ ਕਿ ਇਸ ਨਾਲ ਸੇਵਾਵਾਂ ’ਚ ਸੁਧਾਰ ਆਉਣ ਦੇ ਨਾਲ ਨਾਲ ਟਰਾਂਸਪੋਰਟ ਵਿਭਾਗ ’ਚ ਫੈਲੇ ਭ੍ਰਿਸ਼ਟਾਚਾਰ ਤੋਂ ਵੀ ਅਜ਼ਾਦੀ ਮਿਲੇਗੀ, ਨਾਲ ਹੀ ਇਸ ਖੇਤਰ ’ਚ ਫੈਲੀ ਮੋਨੋਪਾਲੀ ’ਤੇ ਵੀ ਲਗਾਮ ਕੱਸੀ ਜਾ ਸਕੇਗੀ।
ਇਸ ਮੌਕੇ ’ਤੇ ਟਰਾਂਸਪੋਰਟ ਮੰਤਰੀ ਨਾਲ ਹਮਦਰਦੀ ਪ੍ਰਗਟਾਉਂਦਿਆਂ ਖੰਗੂੜਾ ਨੇ ਕਿਹਾ ਕਿ ਟਰਾਂਸਪੋਰਟ ਬਿਜ਼ਨੇਸ ’ਤੇ ਕਬਜ਼ਾ ਜਮਾਏ ਬੈਠੇ ਤਾਕਤਵਰ ਵਿਅਕਤੀ, ਜਿਸਦੀ ਉਹ (ਮੰਤਰੀ) ਗੱਲ ਕਰ ਰਹੇ ਹਨ, ਨੂੰ ਹਟਾਉਂਦਿਆਂ ਸਿਸਟਮ ਨੂੰ ਸਾਫ ਕਰਨਾ ਵਿਹਾਰਿਕ ਨਹੀਂ ਹੈ। ਖੰਗੂੜਾ ਨੇ ਕਿਹਾ ਕਿ ਟਰਾਂਸਪੋਰਟ ਮੰਤਰੀ ਸਿਰਫ ਉਨ੍ਹਾਂ ਪ੍ਰਭਾਵਸ਼ਾਲੀ ਲੋਕਾਂ ਅਤੇ ਉਨ੍ਹਾਂ ਵਲੋਂ ਚਲਾਈਆਂ ਜਾ ਰਹੀਆਂ ਬੱਸਾਂ ਦੀ ਗਿਣਤੀ ਦਾ ਹੀ ਖੁਲਾਸਾ ਕਰ ਦੇਣ, ਉਹ ਵੀ ਸਿਰਫ ਰਿਕਾਰਡ ਵਾਸਤੇ, ਨਹੀਂ ਤਾਂ ਲੋਕ ਸੱਚਾਈ ਨੂੰ ਚੰਗੀ ਤਰ੍ਹਾਂ ਜਾਣਦੇ ਹਨ।